| დღეს ვანკუვერის ზამთრის ოლიმპიურ თამაშებზე ფიგურულ ციგურაობაში ყინულზე ცეკვების დასკვნითი შეჯიბრება გაიმართა, სადაც 15 ქვეყნის 23 წყვილთან ერთად ქართულმა დუეტმაც იასპარეზა. ქართულმა ოლიმპიურმა წყვილმა ამჯერად თავისუფალ პროგრამაში მოსინჯა ძალები. მსაჯებისგან 63.45 მეასედი ქულა დაიმსახურა, სამივე პროგრამის ჯამში მათ 132,32 ქულა მოაგროვეს, რაც საკმარისი მხოლოდ 22–ე ადგილისთვის აღმოჩნდა. შეგახსენებთ, რომ ოთარისა და ალისონის წყვილი სულ შვიდი თვეა რაც არსებობს და ვანკუვერის თამაშები მათთვის მესამე საერთაშორისო სტარტი იყო. ოლიმპიადაზე ჩვენს წყვილს ბოლო რეიტინგი ჰქონდათ და ტურნირი ბოლოსწინა ადგილით დაასრულეს. მარტის ბოლოს ტურინში მსოფლიო ჩემპიონატი გაიმართება და იმედი ვიქონიოთ, რომ ოთარი და ალისონი იქ უფრო დამაჯერებლად იასპარეზებენ. აქვე დავძენთ, რომ ვანკუვერის ოლიმპიადაზე იაპონიის სახელით ასპარეზობენ ჯაფარიძის მეწყვილის დედმამიშვილები – კეტი და კრის რიდები, რომლებმაც 17 ადგილი დაიკავეს. |
